تحالف البامية !

وليد المشيرعي 
الحوار المتمدن-العدد: 6288 - 2019 / 7 / 12 - 14:30 
المحور: كتابات ساخرة 

المصري الطيب الحاج زكريا الذي عقدت معه تحالف البامية (يعني لما تيجي بامية كويسة هاارن عليك) .. 
سألني بالأمس (ايه اللي حاصل عندكم في اليمن؟!) 
كانت الدنيا حر ولاتحتمل الوقوف طويلاً أمام محل خضار الحاج زكريا فقررت الاختصار :
فاكر ياحاج المرحوم جمال عبدالناصر عمل ايه في اليمن ؟
- فاكر ومش فاكر .. يعني زي الطشاش كده !
- عندك حق تنسى فات زمن طويل واتغير الوقت والظروف بس مش هاطول عليك .
بص ياعمو.. اليمن قبل ٦٠ سنة كانت مقسومة نصين .. نص يحكمه ملك طاغية ومتجبر ومتخلف معاه ولاد عم كثير وشايفين ارواحهم فوق مستوى البشر ..
والنص التاني معششين فيه الخواجات الانجليز يبيعوا ويشتروا كأنه عزبة أبوهم ..
المهم شعبنا عمل ثورة ومصر عبدالناصر وقفت معاه وضحت بالكثير من اجل يوقف اليمن على رجليه ويمتلك جيش قوي ويتوحد وياخذ مكانه الطبيعي بين الأمم ..
وده اللي حصل بعد حرب شرسة ونضال طويل .
ابتهج الحاج زكريا في مابدا انه فهم التاريخ وباقي تكة ويعرف الحاضر والمستقبل كمان ..
- هه وبعدين حصل ايه ؟
- ولاحاجة من سنة ٢٠١١ ابتدا المخطط الوسخ ولسا شغال ..
شوية شوية رجعوا اولاد عم الملك المدفون عملوا هلمّة وغاغة كبيرة عاوزين يحكموا من جديد بس معاهم لغة جديدة وهدوم مانعرفهاش اتخدع بيها ناس كثيرة قبل مايعرفوا ان حكم الجبروت والتخلف رجع معاهم من ثاني والعن من الأول ..
وياليت كده وبس .. الخواجات الانجليز رجعوا ثاني بس من بعيد لبعيد بيشتغلوا شغل جامد علشان اليمن يرجع عزبة أبوهم ..
المهم يامعلم بقت زيطة وكل واحد عنده حاجة والا مشكلة عاوز يصفيها مع جيران اليمن يجي يحط رجله في اليمن ويشعللها أكثر ..
كل ده والشعب اليمني وحده ينضرب من كل العالم ولامعاه مصر ولا عبدالناصر ..
عند هذا الحد توقفت بي الكلمات وخنقتني عبرة انقذني منها الحاج زكريا بقوله :
انا بااقول خلينا في تحالف البامية احسن .. عاوز كم كيلو ؟
- كيلو ايش ياعمو ؟!! هات ربع واللي فيها دود هاارجعها مش هاارحمك .